الآيس كريم على طول بعمله في البيت بالطريقة دي للشيف سامح صدقي وبيكون أحسن من الجاهز وبعرف أنوع في النكهات براحتي، أنا مصورالكم الخطوات وكاتبه الطريقه على كل خطوة علشان محدش يتلغبط ويرجع يدعي عليا
تعديل علشان الناس الحلوين اللي هيضموها للسكرين شواتات اللي ملت الموبايل هكتبلكم الكلام اللي علي الصور كله هنا والناس اللي لسه مشافتش البوست قبل كده شوفوا الصور كلها واقروا اللي مكتوب عليها علشان تفهموا الخطوات قبل التنفيذ
الطريقه كامله*الأساسيات
2 ويبد توبينج
علبة حليب مكثف
3 تربع كوباية ميه متلجه
ربع كوباية لبن متلج
(ممكن نخلي كله لبن او كله ميه، بس الميه بتدي نفس القوام المتماسك بتاع الأيس كريم الجاهز، واللبن بيدي نكهه جميلة)
بنجهز الاول كل حاجة هنستعملها الفواكه أو الشيكولاته
صوص الشيكولاته
1- 6مكعبات شيكولاته + تلت كوباية لبن + نص معلقة صغيره ذبده.
بنسيح الشيكولاته في حمام ماء أو على نظام فك التجميد 3 دقايق في الميكروييف (مينفعش نظام التسخين علشان متسخنش وتبوظ الكريمه لما تتحط عليها) ، ونطلعها نقلبها ونحط عليها الزبدة واللبن.
أو
2- معلقتين كبار نوتيلا + تلت كوباية لبن. (دي بتكون مسكره زيادة عن اللزوم).
بنضرب الويبد توبينج باللبن والميه على أعلى سرعة لحد ما يدي نفس القوام اللي في الصورة.
بنحط عليه الحليب المكثف ونضربهم تاني لحد ما كله يبقي نفس اللون
*طريقة الحليب المكثف في البيت
ربع كوباية ميه دافيه
كوباية لبن بودر أو ربع كوباية حليب
كوباية سكر بودره
معلقه زبدة صغيرة
معلقة فانيليا صغيرة
كله بيتضرب في الخلاط ويتحط في الفريزر 15 دقيقه علشان يمسك وقوامه يتقل.
 |
| إضافة شرح
بنقسمهم في علب علشان نضيف النكهات لكل علبة.
|
بالشيكولاته: بضيف صوص الشيكولاته ومعاه تشوكليت شيبس ونقلب كله في بعضه كويس لحد ما يبقي اللون واحد.
بالفانيليا: بحط معلقه صغيره فانيليا سائلة واقلبها كويس.
بالكراميل: بضيف 5 معالق كبار صوص كراميل واقلبه فيه كويس لحد ما اللون يبقى واحد.
لو آيس كريم بالفواكه: أي نوع فواكه مهروس بالشوكه أو مضروب في الكبه ضربه واحده بس علشان مينزلش ميته.
العلب بتتقفل كويس جداً وتتحط في الفريزر 6 ساعات قبل التقديم.
ليست هناك تعليقات:
إرسال تعليق